當年今日
關於我們

矮到睇唔到 - 李八方

蘋果日報 2007/02/21 00:00


煲呔噚日租咗架冇頂巴士,去太古城、時代廣場、屯門同奧海城巡區,好多市民見到煲呔真人,先知道佢原來得嗰5呎3吋高,加埋佢周圍都有好多高大嘅保安哥哥做圍牆,所以好多市民都睇唔到佢,淨係見到一堆人擁過嚟,怪唔之得奧海城有位小妹妹都要趁新年祝煲呔:「快高長大」!
生得矮唔係罪過,鄧伯伯咁威,就知矮人唔好蝦,但生得矮有時真係會鬧出笑話。煲呔喺架巴士上層度揮手,但啲圍欄遮住佢塊面,啲市民睇唔到佢、記者又影佢唔到,喺下面嘅公關丘福生大叫:"Standup,standup(企起身)!"講都未講完,上面有把聲即刻回應話:「佢已經企咗起身!」惹來爆笑一陣陣。
煲呔呢幾日勁巡區,曾經喺沙田鄉村做過村長嘅陳鑑林外父曾伯踢爆,當年煲呔做沙田民政專員時好少巡區,邊似𠵱家咁鍾意出巡做騷?至多都係聖誕整個party同村代表一齊玩番日咋。時代變喇,人都要變,伯伯,睇開啲喇。