當年今日
關於我們

【美斯大婚】賓客名單曝光 老馬冇份

蘋果日報 2017/06/27 21:30

婚禮巴塞隆拿西甲美斯蘇亞雷斯馬勒當拿尼馬碧基恩尼斯達歐洲足球

嚟緊周五就係美斯大婚日子,婚禮賓客名單已曝光,幾位同佢特別老死嘅巴塞隆拿隊友蘇亞雷斯、尼馬、碧基以及過檔咗車路士嘅法比加斯,據講都會攜眷往美斯阿根廷家鄉羅沙里奧出席,但賓客名單中就冇前巴塞教頭安歷基同埋早前曾支持國際足協(FIFA)罰佢停賽嘅球王馬勒當拿。
雖然美斯做老襯單新聞近期鋪天蓋地,但阿根廷《國家報》就話美斯嘅婚禮大概只有260個賓客,比起前球王馬勒當拿喺1989年結婚時少成千人。當年,老馬請埋前意大利總理兼AC米蘭班主貝盧斯科尼,好大排場咁,但美斯就冇諗住請咩高官達貴到場,就連老馬都冇份。
美斯今年三月喺世盃外疑似向球證爆粗,結果被FIFA同南美足協追罰停賽四場,但老馬不但冇幫口,仲話美斯抵被罰,有阿國傳媒認為兩人已因此結怨,但亦有報道指根本就係老馬要負責FIFA親善大使工作,去俄國同總統普京會面,所以抽唔到身。
呢260個賓客中,巴塞前隊友同現時隊友都有份,除咗早前同佢兩夫婦一齊去旅行嘅阿蘇以及法比加斯伉儷,碧基都會帶埋佢嘅另一半Shakira到場,而剛甩拖嘅尼馬亦應承會到,唯一落實會缺席嘅,係多年來同佢合作無間嘅恩尼斯達,皆因小白老婆就快幫佢誕下第三胎。
至於季尾離開巴塞嘅安歷基,就冇收到邀請卡,反而有成超過150個記者收邀到場報道盛況。
empty
美斯同安東莉娜周五拉埋天窗。