反世貿遊行，乜人都有，八方噚日行到馬師道，見到一個着晒迷彩服嘅女子，喺女防暴警察前拍照留念，睇清楚，原來係白韻琴小姐，當然同佢拍照嘅係謝偉俊先生。
謝律師後嚟攞住個韓農非暴民嘅紙牌，叫港人唔好怪啲農民，佢哋都係為生計啫，又話佢肯為韓農提供免費法律服務。
咁香港人都好包涵容忍，但係出到鐵架衝撞，又推警車打警察等暴力行為，當然好難接受。不過，話時話，噚日凌晨時分嘅清場真係搞咗好耐，成粒鐘先走幾部車。
有位做攝影師嘅香港人，因為留到最後一刻，竟然唔畀離場，要同韓農一齊送去九龍灣輔警總部，由下晝一點搞到天黑，都冇人理佢哋，只係五點半同八點半有兩餐食，可以去吓廁所，但韓農有要求，竟然冇人明佢哋講乜，咁都得。

傳真︰2623-9278
電郵︰[email protected]