【新增動新聞】

西甲班霸皇家馬德里上周六作客悶和畢爾包0:0，因鼻骨骨折而休戰兩星期嘅隊長沙治奧拉莫斯，今仗戴住保護面罩出場，雖然帶傷上陣但依然無收火，到比賽最後四分鐘仲兩黃一紅被逐。連埋呢張紅牌，拉莫斯喺西甲已經累積拎咗19面紅牌，獨佔西甲歷史紅牌王寶座！

睇返西甲嘅數據，攞紅牌第二多嘅，分別係已經退咗役嘅前桑坦德後衛柏保路艾法路（Pablo Alfaro）同埋前薩拉戈薩後衛阿古亞度（Xavi Aguado），佢哋分別都累咗拎咗18張紅牌，但呢個唔光彩嘅紀錄就畀拉莫斯嘅19面超越。

計埋其他比賽，31歲嘅拉莫斯成個職業生涯已經拎咗24面紅牌，遠超皇馬隊史拎紅牌第二多嘅希亞路（12面）成倍咁多。拉莫斯其餘五面紅牌，有三面嚟歐聯比賽，另外喺西班牙盃亦拎咗兩面。

講返場比賽，皇馬早喺開賽七分鐘已有機會打開紀錄，但賓施馬射門中柱唔入。而兩隊今場互有攻守，皇馬門將基羅拿華斯上半場有兩次重要撲救，換邊後皇馬亦有C朗射門中柱，延續佢今季聯賽冇入波運嘅頹勢；加上畢爾包門將阿列沙巴拿加兩度救出馬些路嘅射門，但兩無隊最終仍互交白卷。

皇馬和波後14戰得28分，錯過拉近同榜首巴塞隆拿距離嘅機會。後者喺同日西甲一樣和波失分，兩隊繼續保持八分距離。

西甲累積紅牌王

球員（曾/現效力球會，領紅次數）
1 沙治奧拉莫斯（皇家馬德里，19面）
2 *柏保路艾法路（桑坦德、西維爾、馬體里體育會，18面）
3 *阿古亞度（薩拉戈薩，18面）
*為已退役球員

----------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM