圈中有唔少千億女婿，好似Mr.主音Alan同黎諾懿咁，但原來舊年離開無綫獨立發展嘅「巨聲幫」劉威煌都係其中一員，今日有報導話佢喺舊年1月已靜雞雞同拍拖7年嘅女友Sandy喺日本沖繩註冊結婚，女方嘅家人於內地經營礦業生意，30未出頭嘅佢手持多個物業，名下有5間公司，業務以貿易同投資為主。

劉威煌對於被指秘娶億萬老婆，佢接受電話訪問表示：「咁誇張，我知佢屋企做生意係咁多，我哋舊年結婚，冇擺酒，如果真正擺酒，想擺得好好睇睇，起碼係我自己畀哂先。」

劉太家底豐厚，會否出錢支持老公?佢話:「冇可能嘅事，唔係想唔想洗嘅問題，男人唔好咁喇！呢個係責任，佢o依家姓劉，關佢屋企咩事，其實o依家好簡單，佢係我屋企人，我要負責任，佢有做秘書。」