反高鐵一役，煲呔殺氣騰騰媽叉班青年人，睇怕遲早「出兵」鎮壓反對聲音。呢個政府口講要多聽群眾聲音，但實際上相當虛偽，另一手已準備緊鐵腕清場。有菜園村村民向八方報料，話特區政府早前call齊防暴警察殺入石崗軍營外圍，喺正菜園村村民屋企附近，進行「清村」演習以示警威，嚇親唔少公公婆婆。
立法會財委會今個月16號先通過669億元嘅高鐵撥款，但政府錢未到手嘅時候，經已準備拆村。最早一次踩場演習，喺上個月發生。據講，當時逾300個全副武裝嘅防暴警察，坐喺一部部警察巴士上，殺入石崗軍營外嘅機場路。當時目睹警察踩場嘅村民阿棠話，佢咁大個仔，都係第一次見到咁多警察入去演習。

突然踩場　嚇親老村民

村民當日所見，班PTU相當有針對性，其中約30人扮村民，其餘近300人就練習清場，即係平均10個警察對付1個村民。呢次演習相當有針對性，扮示威者嘅「演員」手持「反對興建西北鐵路」、「不要賠償要菜園」嘅橫額，上面仲畫咗好多棵樹。畫公仔畫到出腸，係人都睇得出，呢次演習係為村民度身訂做啦。
無啦啦咁大批警察踩場，嚇到班老村民好驚，有村民見馬路旁有幾個警察hea吓hea吓冇嘢搞，咪走過去搭訕，問吓阿sir做乜咁針對性，係咪諗住咁樣對付村民？班防暴警察例牌話「唔係唔係，都係咁啱啫」，叫村民唔好擔心。不過警察呢期講嘢冇句真，PPRB總警司吳家聲都被叫做警隊袁木，所以難怪班村民點都唔信行動唔係針對佢哋。

警方回覆　會定期訓練

菜園村關注組副主席明哥話，聽村民講，除咗上個月，班防暴警上星期都有喺附近進行清村演習。佢希望警察高抬貴手，咪搞到一班公公婆婆年尾流流都要提心吊膽。八方向警方求證事件，問佢哋究竟有冇入石崗演習，係咪練定清場，警方回覆係「警察機動部隊會定期進行不同形式的模擬訓練」。真係多謝晒！

mailto:[email protected]