42歲嘅麥家琪今日繼續喺日本為ViuTV節目「G1格鬥會II」進行拍攝 ，經過噚日嘅訓練後今日就正式上擂台，家琪嘅對手係27歲張可義(Emily) ，比賽以三回合，每回合限時兩分鐘進行。

賽前一輪先禮後兵就正式開始，首先主動搶攻嘅係Emily，連續兩個回合都成功將麥家琪摔落地下，家琪只能零星反抗，到第三個回合先成功摔低對手。其實家琪已經講過打MMA對體能消耗好大，見佢打完每一個回合都氣來氣喘，最終打完三個回合評判判定對手Emily勝出。

落敗嘅家琪接受訪問時講到，被Emily兩度摔落地，佢話：「對方冇鎖實我條頸，其實係大家鬥大力，但佢真係發揮得好好。」會唔會再參加？佢話：「唔知有冇復活賽呢，可能啦！」佢坦言比起專業人士佢哋簡直係唔入流，但經過一段時間訓練，家琪覺得自己今日表現都收貨，見佢大髀瘀晒，係咪頭先打擂台嘅時候受傷？佢話：「好耐㗎喇，之前已經整親。」

同時家琪都坦言輸咗其實係鬆一口氣，始終睇人比賽最開心，佢話：「不過返到去啲仔女知道我輸就會話我渣囉。」又話今次打輸老公就放心晒，佢話：「佢都叫我唔好打，但知道我唔聽，今次都算成功挑戰自己。」

至於勝出嘅Emily就話，今次比賽贏出係意料之外，佢話：「各位參賽者、朋友同屋企人都覺得我勝算唔高，始終我打MMA同泰拳好短時間，自己今日都係平常心去打，家琪都發揮得好好，佢參賽都要好大勇氣，始終大家都係靠個樣搵食。」