夏韶聲(Danny Summer)今日喺中環接受Billboard Radio China訪問，宣傳7月尾推出以「人在做，天在看」為主題嘅新碟《2020 ARRIVAL》，提到全新主打歌曲「沈睡啟示錄」，夏韶聲表示已有10年冇出新歌，問到係咪慢工出細貨？佢表示一直以嚟嘅作品，都係由細細個已經開始構思。

對於唱片製作費，夏韶聲透露每張唱片，至少要花40萬元，佢話：「所以我要儲錢，雖然我唔係大公司過百萬製作，但我大排檔都要用好料，都要用錢。」有冇計劃開演唱會？夏韶聲話：「經理人幫我入紙申請紅館，我覺得適當時候做適當嘅嘢，今年一定唔得，所以最快都要出年。」佢又提到「沈睡啟示錄」MV中，佢會帶住面具：「我唔係神，我只係作一啲關於人生嘅嘢，如果佢哋係天外智者，我係利用佢哋透過呢個面具嘅一隻眼去講嘢，所以呢個面具先係主角。」大家明唔明？唔明就去夏韶聲facebook睇下佢首新作啦！