熊心如同池子孝拍手勢舞向金城安、Bonnie以及秦博思、Mandy下戰書，安仔同Bonnie更加係Sweet到漏拍片，搞到唔少網民留言覺得現實中的周嘉洛同林凱恩應該拍緊拖，如果唔係都做唔出戀人感覺。

而等咗幾日終於見到秦博思同Mandy找數，不過二人默契欠奉，片中見到扮演秦博思的馬貫東去到中段都出現甩Beats情況，並要靠整色整水去豐富畫面，搞到網民要求佢哋重拍!

之前喺討論區有唔少網民認為秦博思同Mandy喺現實中都冇互動，就算拍手勢舞的效果都唔會覺得sweet。反而「熊心如」蘇韻姿、「池子孝」阮政峰以及周嘉洛、林凱恩都不時喺ig互動，將劇中的角色帶到現實生活，令到唔少人覺得佢哋好有愛。不過，亦有網民話劇中秦博思一直都對熊若水念念不忘，如果由呂慧儀同馬貫東一齊拍，效果會比較好。

依家唔少人都希望可以睇到大小姐同送水輝，以及KC同Terry，唔知呢兩pair又會唔會拍一條出嚟俾大家睇下呢?