鍾景輝（King Sir）、萬梓良(萬子)、陳淑儀及李楓等今日出席理工大學舉行舞台劇《小井胡同》記招，此劇作為慶祝理大八十周年，咁啱今年又係King Sir八十大壽，眾人喺記招上進行響鑼鼓儀式，並於下月底至十二月初假理大賽馬會綜藝館公演八場。

萬子今次專程從廣州來港個多月，為演出作準備同排練，原來佢早於去年十二月已經攞咗劇本鑽研，難怪King Sir也大讚萬子處事認真，幾十年來都對佢有信心，只要一踏上舞台便會有霸氣鎮住舞台。

King Sir將會跟隨大隊排練時間，預計近二百小時，佢話有兩位導演幫手，所以有信心體力能應付。

獲恩師大讚，萬子笑指每次喺King Sir面前演出好似考試咁緊張，尤其今次演員特別多，所以要連對手劇本都要熟讀，以免自己演出甩腳，噚晚進行第一次圍讀，萬子笑說：「噚晚有件趣事，導演介紹舞台時，特別同大家講解舞台有個窿，係畀演員出入舞台同後台之用，因為演員太多，為免塞車影響出場時間，不過個窿又唔夠一個人高，所以大家要記住點捐。」

劇中有三十幾位學生演員，萬子笑指喺King Sir面前永遠係新人，所以唔敢去指導學生演員。