下月舉行個唱嘅阮兆祥，今日去商台宣傳，祥仔話屆時會有好多跳舞環節，佢話： 「想畀啲新鮮感觀眾，到時開場會跳十分鐘舞，挑戰舞台王者郭富城，向佢下戰書叫佢嚟睇。」

祥仔仲請教草蜢：「佢哋話如果喺惡劣嘅環境下，後台好焗或者冇乜空氣，會準備氧氣，換衫時索。同埋準備啲能量棒，食一啖會回復氣力，我笑問係咪鴉片，其實係補充能量食物。」原先祥仔都想請曾志偉，但撞正亞太影展志偉就嚟唔到。