當年今日

地產多聲道:南豐示範單位鬥靚

蘋果日報 2004/04/29 00:00


近排個樓市靜咗好多,部份賣緊貨尾嘅發展商,都要出嚟搞吓促銷活動,吸引市場注意。南豐同中原一齊為旗下荃灣翠豐臺,同小欖浪濤灣送家具,重搞咗個「最喜愛示範單位」選舉。
中原黃澤文話,由即日起至下月底止,兩樓盤示範單位嘅參觀人士,都可以選出佢哋心水示範單位,好似浪濤灣就有三個唔同主題嘅示範單位,翠豐臺有五個。每個盤都會設一個大獎同五個特別獎,大獎可得五千蚊家具禮券或商場購物券,特別獎則可得五百蚊旅遊禮券。另外,𠵱家凡買翠豐臺兩房單位,可獲贈五萬蚊家具禮券,三房有七萬五千蚊。
南豐麥一擎話,最近樓市靜咗,可能係大家調高咗售價,又話加息,兼且股市又唔多好,希望搞吓活動同提供優惠,可以吸引買家入市。

地鐵商場提早過母親節
不時都有推廣新招嘅地鐵公司,嚟緊嘅母親節,就用最實際嘅手法,即係送錢嚟吸引消費者,啱晒精打細算嘅媽咪口胃;重決定提早出擊,5月1號已經可以換領。
今次地鐵會送出總值六十萬嘅現金購物券,凡喺九龍灣德福廣場、青衣城同柴灣杏花新城,購物滿八百蚊(憑即日一張食肆及一張非食肆商戶,每張一百蚊或以上發票),可換領地鐵商場一百蚊購物現金券,每間商場名額二千個。而用現金券買滿八百蚊,又可以再換現金券。而其他租戶都有提供優惠畀消費者。
美聯過濠江搵食
美聯測量師行禮拜二請記者去澳門一日遊,主要係睇樓盤,原來佢哋已經打緊呢個市場嘅主意。蘭西噚日見到報紙廣告,美聯會搞三個澳門睇樓團,聽測量及策劃部董事張一輝講,半日已經有兩團爆咗,每團約二十五至三十人,反應熱烈。
張一輝話,佢哋計劃喺澳門開設分行,𠵱家留意緊睇樓團嘅反應先至落實。
佢透露,當地有公司肯畀寫字樓佢哋開分行,條件只係由美聯負責交雜費,條件咁優厚,係因為當地嘅商業活動唔係咁活躍。

物業管理一腳踢
市民對住屋嘅要求愈嚟愈高,物業管理公司提供嘅服務就層出不窮,無非都係想切合住戶需要。
新地嘅土瓜灣農圃道十八號,宣傳攻勢浪接浪,負責管理嘅康業,噚日向傳媒介紹物業嘅個人化管理服務,例如幫住客買家居用品,代辦消閒活動同埋打理家居瑣碎事等。
將單位出租嘅業主,重可以搵管理公司幫手收租,安排續租,代交差餉、地稅同管理費等。負責賣樓嘅代理總經理周國賢話,希望下個禮拜開放現樓示範單位畀傳媒睇,或者會喺母親節檔期開賣。
中環今日吹夏威夷風
商業中心區嘅中環,今日變得動感火熱,皆因會有兩個身穿草裙、頭戴花環嘅外籍女郎,喺中環繁忙街道上大跳草裙舞,令中環充滿夏威夷風情。跳舞女郎沿途重會派發「悠然自Duck」黃色鴨仔玩具畀途人。
呢兩個外籍靚女嘅跳舞路線,係由太子大廈德輔道中出口開始,經滙豐總行,沿皇后大道中九號往中匯大廈,至終點娛樂行。
原來呢個活動係由信和集團策劃嘅,目的係宣傳集團旗下屯門黃金海岸嘅租盤。認真夠出位。不過,今時今日嘅環境,打工仔見到人跳草裙舞,會唔會有另類聯想呢?
蘭西
電郵地址:[email protected]
empty
翠豐臺示範單位
南豐為呢兩個盤搞搞新意思,希望吸引準買家嘅注意。
empty
信和為催谷黃金海岸租務市場,請咗兩位外籍女郎喺中環跳草裙舞,兼且會派發黃色鴨仔玩具畀途人。
empty
信和為催谷黃金海岸租務市場,請咗兩位外籍女郎喺中環跳草裙舞,兼且會派發黃色鴨仔玩具(圖)畀途人。