電影《壹獄壹世界：高登闊少踎監日記》今個月28號就會上映，近日就開始為電影做宣傳，噚日主角之一嘅張建聲身先事卒，走入「流動水飯房」展開72小時踎監之旅。

依家仲喺「流動水飯房」嘅張建聲，喺今日下午四點，已經踎咗26個鐘頭，今朝佢仲有啲呆滯feel，對住直播cam自言自語：「個人係會困到癲，我都叫好啦，有啲嘢望吓，如果真嘅話，20個鐘頭已經黐咗線，崩咗潰。噚晚唔係好瞓到，今日好麻麻哋，實在難以形容。」

今日同張建聲同公司嘅莊思敏(Jacquelin)、唐貝詩(Lydia)同老闆蕭定一到場探監，張建聲見到佢哋終於識笑，仲同莊思敏喺囚車上面齊齊踎任人影，張建聲仲大呻話：「好鬼辛苦，第一時間長，第二係好多街坊friendly，但周圍冇牆，好似瞓喺條街度好唔自然，最驚瞓覺，一紮醒瞓喺條街度，嚇到我吖，勁驚，我出返去會好好做人架啦。」

除咗張建聲嘅72小時踎監之旅之外，仲有另一個宣傳計劃，就係網上創意留言遊戲的參賽者踎監，成功踎到3日獲獎$8,000元港幣，踎足7日則獲$20,000元港幣，好多網民都火速洗版參加，仲有網民話好搵過打工一個月，依家報名坐監嘅人數已高達600人。