吳若希(Jinny)今日出席《IFPI香港唱片銷量大獎2016》，Jinny以《眼淚的秘密》一碟奪得「十大銷量廣東唱片」。提到今日係產後領取嘅第一個獎，記者問到佢呢次係咪最後一個獎，Jinny好大反應話：「唔係，會keep住工作，星期五就會錄新歌喇！」有新歌就要宣傳，追問佢老闆有冇叫佢唔好再生BB住，佢話：「公司冇咁嘅規限，而且我都唔會咁快啦，醫生都有提醒我唔好咁快(再生BB)，我都ready好復出㗎喇！」

復出已做好準備，問Jinny會唔會唔捨得囡囡，佢話：「會呀！o依家出門，都會早一個鐘起身，同個女玩完先出門口，o依家囡囡都已經識自己轉身㗎喇！」提到噚日佢同男友Alex捧朋友場，即刻有份拉頭馬(新聞連結： http://bit.ly/2jg93Qd )，記者大讚佢好腳頭，Jinny話：「噚日都贏咗五位數字，其實都唔關我事㗎，隻馬係朋友嘅，我都係沾一沾人哋嘅旺氣囉。」問到會唔會叫男友Alex做馬主，佢話：「希望之後有消息公佈啦！我對馬都有興趣，但就唔熟，都要交俾專業人士去搞。」

原來佢同人籌組咗一個慈善機構「愛馬女士協會」，正抽緊一隻馬，佢話：「就算抽中(馬)都要訓練，呢個協會共有七個人創辦，我就係呢個會嘅總理，都要夾錢，都係做善事，11月會同澳門嘅孤兒院合作搞活動，自己要落手落腳跟，所以都有啲緊張。」