有「嫩版徐若瑄」之稱既劉燕妮(Rika)，前排有參與ViuTV既MMA真人騷《G-1格鬥會》，哭訴俾對手黎美言(Winkie)打到變豬頭兼留有陰影，佢噚晚睇完佢同Winkie對打嗰一場之後，Rika今日喺ig寫咗篇千字文宣布退出娛樂圈。

講到同Winkie之間恩怨，Rika話大部份是非話題都係由佢哋場比賽受傷而引起，佢希望以當事人嘅身份作出一個總結，佢話：「從節目見到，受傷後我真心沒有怪責對方，當時有稱讚對方打得好，但爆發點係賽後在化妝間休息，我和幾位朋友聊天，講笑自己變了花面貓，Winkie走過來表情和語氣帶有挑釁性：「Rika，對唔住啊，其實我唔想打你架，我已經留咗手架啦」x3次，這轍(徹)底觸及我個人底線，我覺得好不受尊重和憤怒。」

Rika話從來都冇怪過對方重手，佢覺得係自己冇保護好自己，之不過呢個挑釁對佢嚟講係一個臨界點，佢仲話：「好多事情局外人難分對錯，只有立場。我亦明白對方承受了許多輿論壓力，我只能總結一句：好多人的最大問題就係覺得自己無問題，『我係咁架啦』去面對一切事情。希望她日後待人處事會更好，祝福她。我亦都會檢討自己有哪些不足地方。」

講到目前傷勢，Rika話：「至今約五個月後，飛蚊症還在，左手中指彎曲、條腰經常隱隱作痛。整個節目最大遺憾喺比賽前已經有腰傷，令我戰鬥力廢咗一半，無得發揮自己最大實力，非常遺憾，無人會明白嗰種無奈。盡管好多傷，但沒有後悔，係人生好寶貴的經歷。」最後佢喺ig留言，決定退出娛樂圈：「如有人說我放大傷勢來博同情，我想說憐憫之心，人皆有之，唔係博就會有，如果有人因拍攝節目而傷到咁，我都會好心痛，正常人都會吧？我亦明白好多人說話好刻薄，不能控制別人，只能做好自己。如有人說我想紅、想博上位，所以需要付出代價，行動勝於雄辯，《G-1格鬥會》將會係我最後一個節目，之後會退出娛樂圈，過番自由、平凡的生活。」佢仲話：「人生有許多不同追求，往後會轉行跟朋友一起投資做生意和在法律學習上更上一層樓，計劃明年出國讀書，再從事相關行業，為自己設立更高人生目標。」

另一方面，Rika既經理人公司星淘娛樂，今日亦為咗Rika退出一事回應：「對於Rika的決定深表可惜，因為要栽培一位有潛質的新人並不容易，雖然極力游說她休養一段日子再回來，然而她去意已決，始終對於娛樂圈要面對的人與事未能適應，所以雙方協議下同意讓她退出，專心讀法律課程，向另一方面發展，祝福她未來生活愉快！」