華爾街大鱷酬金高聳入雲，長期俾人鬧到暈，好多人都指摘係造成金融危機爆發嘅主因之一，作為監管國際金融機構嘅巴塞爾銀行監管委員會兩年前頒佈咗《穩健薪酬實踐準則》，要求對大行高層嘅人工引入一定限制，最近新例仲提出「金手指」機制，鼓勵舉報違規行家，香港金管局都引入埋呢啲新例，睇嚟陳德霖要實啲嘞。
巴塞爾委員會係喺前年初，根據金融穩定理事會（FSB）提交嘅報告制訂金融機構薪酬準則，所謂健全薪酬準則，係指金融機構董事會喺設計薪酬制度時，要充份考慮同業績掛鈎嘅考核標準，用股票代替純現金作為獎勵酬金嘅方式，仲要延遞同分期支付。

針對海外銀行搶高人工

舊年11月，FSB再覆檢標準加設新例，引入「金手指」機制，如果有金融機構發現其他地區嘅行家未有執行新例，可進行舉報。呢套新嘅「雙邊投訴處理程序」（BCHP），金管局喺今年初已經引入香港，噚日就向銀行正式頒佈。
聽講設立呢啲新例，主要係為咗避免有海外銀行唔遵守規定，搶高人工爭人，造成同業之間不公平競爭。
根據金管局噚日向銀行發出嘅通告，如果本身係香港註冊機構，喺有證有據之下，係可以直接向金管局舉報外地違規對手；如果銀行係附屬機構或者係海外銀行香港分行，咁就會將投訴轉介去海外控股公司所屬地區嘅監管當局處理嘞。所謂商場如戰場，真係不變嘅定理。

李華華
mailto:[email protected]