韓國MBC電視台人氣綜藝節目《我獨自生活》為慶祝今年節目開播5周年，特別邀請天團BIGBANG成員勝利、男團東方神起拍攝5周年特輯，公開佢哋屋企及私生活一面。

節目噚晚播出東方神起兩位成員U-Know及Max嘅內容，只見因為兩人唔同嘅性格，所以私下生活方式都大有不同。今次係東方神起出道15年以嚟首度公開自己嘅屋企，由於U-Know一起身就練舞，連Max都頂唔順，所以6年前開始搬出去自己住。雖然生活方式好唔同，但兩人就透露之前一齊住宿舍時都從未嗌交。

私下Max習慣半裸瞓覺，所以每朝起身奉旨大晒腹肌，好不養眼；至於鍾意熱鬧嘅U-Know就好似冇休息過咁，起身練舞後又約一眾好友外出遊玩。而東方神起亮相節目亦帶挈節目收視上升，兩節嘅收視率分別為9.7%及11%，比上周勝利嘅特輯錄得嘅8%及10.6%仲要高。

更多韓流，喺晒《娛果》
http://fb.com/appledailyent