於翠屏婦女會任職的許小姐表示，早前該會收到上水長瀝村慈康農圃的宣傳單張，內容聲稱由專業導師提供有機耕種講解，認識有機耕種及食品的好處。
不能提供收割環節
該會有見活動訊息正面，而且團體收費每人只需八十五元，故與慈康接洽，並說明希望可讓長者到農場體驗種植收割，緬懷多年前於鄉間生活的情懷。「我哋講明啲食物要腍啲，唔好太濃味；當時佢哋重話：『你放心啦，我哋一定會預多份量，一定夠食！』」
該會於一個月前預訂並全數支付百多名團友的費用，但出發前數天，慈康才告知許小姐，由於近日天雨關係，菜苗「落一批死一批」，故未能提供收割環節予團友。
豈料抵達農場時，一名團友譚先生稱：「嗰啲大堆大堆嘅野草重高過啲植物，又多又亂，好多地都好荒蕪，好似爛地咁，泥又乾又實，你話可以種得乜？」團友李女士則表示：「成個農場得三行好少嘅植物苗，我哋百幾人，連企十分之一人埋去都唔得？」
眾人見場內景況已大感失望及掃興；而到午膳用餐時，眾長者更群起鼓譟，許小姐憶述：「我哋見到啲食物，當堂嚇一跳，份量點可能咁少；啲老人家用咗半個鐘行入嚟，再行完農場，已經好肚餓。我睇到咁嘅情況，真係好嬲，好唔安樂！」