今日九龍一個慈善晚宴，除咗有近拍緊《HotelKing》嘅韓星李多海之外，同場有MandyLieu、LeaT.、Ana.R、樂基兒首飾品牌廣告女Mia等，個個靚女都大晒性感，MandyLieu大露背，Lea就谷胸露腰、Mia超低V但就失手露膠紙。

Mandy話好期待見李多海真人，最近多韓國男星香港嚟，終於有女星嚟。早前Mandy出席活動見到Rain，佢笑住話：「有韓星就有我！」而且活動係關於慈善同高踭鞋品牌，自認高踭鞋粉絲嘅Mandy，揚言為慈善可以買50對。

問會唔會同李多海集郵？MandyLieu話：「呢個會，鍾意靚女，聽聞佢英文好，有得溝通。」咁有冇學韓文傍身？佢話識「你好」、「我愛你」同「oppa」幾句。

MandyLieu又話，最近忙於宣傳旗下日模清穗久美子同韓模金愛妍，話佢哋日日都著泳衣亮相：「頭幾次我都流鼻血，依家麻木。」點解自己唔著泳衣？佢講笑話：「唔出嚟撼，搶風頭，我一出寫真就全裸，你哋等下。」