【新增回應】

今年56歲嘅黃秋生，同太太吳惠貞結婚26年，婚後二人育有兩子睿名及煜政，然而本周四《蘋果》卻收到一名自稱Joyce的讀者報料，稱已婚26載的秋生，有一個20歲的私生子，秋生回覆本報時亦直認不諱，承認William係佢嘅私生子(新聞連結： https://bit.ly/2lKUHpC )。而William嘅生母就係Joyce，今日有周刊報道指廿年才爆料，與「錢」字有關。

報道指，Joyce是岑建勳嘅姨甥女，Joyce喺17歲嗰年同已婚嘅秋生拍拖，話佢哋嘅關係維持咗十年，當時Joyce英國、香港兩邊走，到William兩歲嘅時候就同囝囝返咗英國定居，報道指多年來秋生都有做父親嘅責任，仲喺英國買屋安頓佢哋兩母子。

然而過咗廿年，Joyce才公開數臭秋生，報道就指有人多年來將囝囝當係提款卡，不時要求「加碼」。有指秋生以往亦會接到囝囝嘅爆喊電話，秋生唔想難為阿仔，故一直「合作」。

今年20歲嘅William，準備升讀大學，秋生覺得William都大個仔，所以就將生活費直接過俾佢，引起某人不滿，故將私生子一事公開。

今日《蘋果》聯絡過秋生，對於私生子被公開係疑是與金錢糾紛有關，以及Joyce已再婚，佢話：「咪好囉，終於有個了結。佢一早就應該將啲心血放番喺自己家庭啦。不過佢o依家又唔俾個仔返屋企，我依家又擔心緊個仔入大學前住喺邊。呢樣唔得又嗰樣。」

對於秋生指控，Joyce回覆：「I’m not a celebrity, I have no image I need to protect. Write what you like. My job is complete here.(我不是名人，我沒有必要保護甚麼形象， 隨你喜歡點寫， 我的工作已經完成。)」

精選娛聞，喺晒《娛果》
http://fb.com/appledailyent