【金手指】幾時投降去追貨（孫柏文）
蘋果日報 2020/06/15 19:01
孫柏文金手指
孫柏文：巴菲特再買，就係跟之時。否則，永不投降去追，視升市為浮雲。
做得孫柏文嘅fan屎，應該喺武肺前將手上資產大減磅，跟住就喺3月嫌啲資產價格未夠平下，冇買。或者買唔夠貨。
而當之後各國央行更瘋狂印鈔，出現我嘅女神胡孟青青姐嘅名言「風大起上來，垃圾都吹得起」時。就睇住啲股價大幅反彈，甚至好似啲美帝科技股咁，創歷史新高，你嘅腦裡，應該同我一樣日日問：「追唔追好？」
到今日，我都仲係喺3月低位後冇增持。現金比重好重。連啲避美大陸科技股嘅港板上市都唔參與玩首日鮮。冇錯，喺咁嘅情況下，睇住啲股價日日升，確實係個煎熬。
而就算活過好多好多次嘅熊市反彈，歷年見過無數世界各地嗰種，無名種毒散戶極速變股市KOL嘅經驗。當見啲央行咁全心去摧毀啲貨幣購買力時，真係唔好話唔考EQ。
不過，周末本報有篇報道，幫我穩按兵不動之心。報道就係講話美帝啲航空股喺低位升返幾多，而之前不斷沽手上航空股嘅股神畢菲特，被放大題，話佢執少咗十億美元。
喺我記憶當中，對上一次畢菲特喺咁不斷被攞出來笑，近乎被話「uncle你唔get」，就係千禧年第一次dotcom泡沫嗰次。嗰轉，連不斷話啲股價黐晒線嘅大鱷索羅斯，都忍唔住喺近高位投降追科技股。畢菲特呢？冇。當年結局如何，大家心照。
就係咁，我而家諗「追唔追好？」時，答案好簡單。畢菲特再買，就係跟之時。否則，永不投降去追，視升市為浮雲。因啲股價真係浮雲般了。
-----------------------------
-----------------------------