日本男星松坂桃李上噚晚播出嘅富士電視台節目受訪，被主持人松本人志問到感情事時竟然罕有爆料，承認曾與一名圈中女星拍拖，令網民懷疑佢講緊正係一度同佢驚爆姐弟戀及傳出婚訊嘅當紅女星綾瀨遙！

松坂桃李同綾瀨遙合演電影《蒙羅麗莎之瞳》被指撻着，兩位當事人從未親口承認拍拖，隨住姐弟戀已成過去，29歲嘅松坂桃李於節目上摸住酒杯底受訪，正所謂酒後吐真言，佢於節目上就自爆情史，透露曾先後戀上圈外人及圈中人，松本人志在鏡頭前毫不客氣問：「你同過名人拍拖呢？」松坂桃李直認不諱，雖然松本人志追問係幾時嘅事，但松坂桃李似乎醉唔晒，未肯講太多內容，只話對方比自己更唔方便公開戀情，雙方拍拖兩年都係分手收場，松坂桃李自言目前單身未有女朋友。

松坂桃李坦言舊愛比自己年長，又話目前會選擇比自己年輕嘅另一半，亦希望對方擁有長輩嘅知識，而節目出街後，唔少人都覺得佢所講就係綾瀨遙，不過亦有網民指佢如今嘅擇偶條件同綾瀨遙有啲出入，繼而引起網民熱烈討論。

精選娛聞，喺晒《娛果》
http://fb.com/appledailyent