一味窩輪:大跌Call輪咪貪平

蘋果日報 2002/01/16 00:00


恒指差不多再散兩嚿,有得升嘅窩輪,同前日一樣,又係得9件,當中包括滙豐(005)同和黃(013)兩件認沽輪,以及杜指認沽輪。佢哋上升,唔使解畫。
下跌窩輪則多好多,溢價高嘅藍籌認購輪,愈近末日,愈跌得淒涼。正股就算唔跌,佢哋都要跌。
滙豐認購輪1704同1735,分別急挫61%同31%;和黃認購輪1765散20%;中移動認購輪1715碌低15%。呢「4大天王」好難救得番,千祈咪手多博反彈。
就算認為恒指萬一點守得住,大隻藍籌有機會反彈,都咪搞呢啲認購輪,要做嘢都應該實實際際向正股埋手。
新嘅備兌輪枝節問題搞掂,下禮拜恢復發行,畀多些少耐性,等啲新輪登場至諗對象。

吼低買入1759
油股窩輪數據比較實在。隔晚油價散0.83元,中海油(883)跌3.8%,拖低啲認購輪,1759同1762兩隻中海油輪分別唔見13%同12%。吼住1759,現價11.7仙,喺10仙邊邊上車。