港台王牌節目《城市論壇》做埋噚日唞暑一個月,大家都好關心節目9月重來時會唔會有新人事、新作風?皆因噚日呢集可能係主持人蘇敬恆(蘇B)嘅告別作,盛傳佢會喺呢個炎炎夏日跳入「熱廚房」,任食物及衞生局局長嘅政治助理。唔少論壇常客節目開始前議論紛紛係咪會有新主持,有人趁台下發言時段恭喜蘇B「升官發財」,蘇B只係回頭一笑,冇任何回應,搞到唔少粉絲心癢癢。
節目完咗,向來多數訪問人嘅蘇B呢次變咗受訪者,佢亦大方接受訪問,但對於新動向繼續冇正面回應,只係話今集係呢季《城市論壇》最後一集,相信9月時仍會有好多題目要傾,「我知道大家好關心我嘅去向,多謝傳媒朋友嘅關心,我希望大家繼續支持《城市論壇》,繼續支持香港電台,繼續公營廣播」。