當年今日
關於我們

【歌手唔易做】出道7年明白計劃未必似如期 Robynn & Kendy:關關難過關關過

蘋果日報 2019/03/19 00:30

RobynnKendyRobynn & Kendy

就在Robynn & Kendy將踏入七周年之際,Robynn宣佈踏入人生另一頁成為譚太,身為拍檔的Kendy回想得知婚事一刻,完全沒擔心過Robynn嫁人後便會消失,全因她心知Robynn的丈夫是強大後盾,令Robynn更無懼地闖音樂路。今天的譚太 & Kendy,有如變成Robynn & Kendy 2.0,由以往小清新感覺蛻變成憑歌分享人生經歷的兩把好聲音。
兩個人的關係踏入第七年,「七年之癢」一詞便會無形地套入當中,12年出道的Robynn & Kendy(R&K)近日亦不時被問此事,年初榮成為譚太的Robynn指不明為何以七年定為界線,她說:「過去七年,其實都有好多呢啲關口,我哋會諗跟住會點,不過關關難過關關過,而家明白計劃未必似如期成果,不如做好啲作品,用最好方法呈現畀大家聽。」
面對拆夥危機是16年,14年參加浙江衛視節目《中國好聲音》第三季後,接着推出首張國語專輯《如果‧我不完美》,但走完各地宣傳後,她們不明為何,突然間身邊同事、化妝師等整個團隊的人都消失了,頓時感到沒有將來一樣,Kendy說:「嗰時我哋就一齊放假,點知發覺個假越放越長,當刻我喺一個無先兆情況下突然剪咗個短髮,心裡就好強烈有種釋懷感覺。」
Robynn指兩人雖然一同經歷高低,但心態上總有不同,互相扶持,她說:「我記得16年時唔明發生乜事,突然冇人理,又發覺身邊大學同學開始升職,有自己團隊同下屬,我就開始上網搵下有冇心理學學位課程再讀落去。」當她將無奈感跟Kendy傾談時,Kendy仍然抱有希望,Kendy說:「唔等都等咗咁耐,我覺得音樂上係無限大,我哋試咗嘅嘢只係好少。」Kendy坦言至今仍有迷茫感,不知前路如何,幸好本身有種自療能力,讓自己繼續堅持音樂路,亦享受每次做音樂中的過程。
組合總有意見分歧,相處七年,Robynn覺得Kendy比以往更勇於表達意見,她說:「佢以前嘅口頭禪係『可以呀﹗』『我未諗到,畀我諗下﹗』可能佢係想Say No,但冇講出口。」Kendy則覺得Robynn處事態度比以往更堅定,Robynn笑說:「初出道時成日覺得畀人小清新感覺,就要好carefree,畀咗無形壓力自己,其實我本身係有規劃嘅人,我而家會擺明自己係處女座﹗哈哈。」經過多年摸索,Robynn笑指只要看Kendy一個眼神,便知對方是否接納提議,她說:「每一個關係,不論R&K,定Robynn & Jonathan(丈夫),對方嘅認同係非常重要。」
去年Robynn宣佈將踏入人生另一階段,Kendy坦言從沒擔心過拍擋嫁人後便拆夥,她說:「我好肯定佢唔會,我識咗佢老公咁耐,好奇怪,我好似第一次咁稱呼佢,嗰時去內地比賽,佢有時都嚟支持,已經知佢哋好恩愛,係Robynn嘅強心針,同埋有老公係好大後盾,可以無懼地闖。」問到Kendy何時將男友變成老公?她笑說:「我唔知呀,我係浪漫主義,可能唔結婚,心態好似結咗婚咁。」講到男友是否強大後盾時,她失笑說:「我諗我強啲。」
Robynn仍陶醉新婚階段中,每當提到老公Jonathan,嘴角便掛上甜絲絲笑容,若果一百分是滿分,她毫不猶豫地給老公一千分。婚禮當日,她最難望是老公在教當宣讀誓詞時,她說:「原本姊妹們想遞紙巾畀我,點知佢哋自己一個傳一個嚟用。我好驚訝佢(畀我呢份難忘感覺),因為佢平時唔會咁做出嚟。」正當問到Robynn誓詞中最難忘一句是甚麼時,當時擔任姊妹之一的Kendy說:「我聽到佢話會為Robynn放開一切勇敢去做時,嗰一刻好感動,因為佢平時係好冷靜處事。」問到Robynn可有盡太太責任入廚?她說:「佢煮嘢比我叻,佢煮我洗,我唔想佢食物中毒,終有一日我做媽咪前我會學識入廚,不過距離仲有好遠,而家急促成長中。」她指家人都沒有催促生BB,但自己都會期待有小生命到來,問到會否覺得自己是怪獸家長?她無奈說:「喺香港做媽咪真係好大壓力,出世就話要搵學校,我暫時會問身邊朋友收集資料同經驗。」
相隔三年多再推出新專輯《curations》,Robynn & Kendy覺得從經歷低潮寫出《負攝石》,到彼此互相扶持創作出《世界對我們》,之後的《青春終老》、《荷光》到剖析出心路歷程的新歌《明陣》,剛好時間將她們這幾年來經歷的一圈分享出來,有種完滿感覺。Robynn指每首歌都如一幅畫,將當刻畫面記下來,然後專輯如畫展般展覽出來。踏過事業上高低起跌,兩人更豁達身邊事物,他們領會可遇不可求道理,尤其在樂壇上,身邊有不少具潛力的音樂人,努力多年後得到成果是不成正比,全因要配合天時地理人和,她們覺得到今天R&K仍然有公司支持,能夠以最愛的音樂作為事業跟大家分享,已是幸福的事。
採訪:馬建華 
攝影:陳慧安
場地:銅鑼灣 YooHex
髮型: [email protected] hair
化妝:Circle [email protected]
《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw
全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef
empty
原是Youtuber的Robynn & Kendy於12年出道。
empty
去年Robynn宣佈將踏入人生另一階段,成為譚太的Robynn仍陶醉新婚階段中。
empty
Kendy坦言從沒擔心過拍擋嫁人後便拆夥。
empty
組合總有意見分歧,相處七年,Robynn覺得Kendy比以往更勇於表達意見。
empty
Kendy則覺得Robynn處事態度比以往更堅定。
empty
Robynn指兩人雖然一同經歷高低,但心態上總有不同,互相扶持。