韓國天團BIGBANG已入伍成員T.O.P今日突然驚爆早前涉吸食大麻被調查，甚至檢驗毛髮結果顯示對大麻呈陽性反應，令粉絲大感震驚，隨後T.O.P所屬嘅YG事務所發聲明承認事件，並表示T.O.P正深刻反省中。T.O.P涉吸大麻嘅事爆出後，唔少網民翻摷出之前嘅報道，有指YG旗下唔少藝人都曾經捲吸毒風波，包括前女團2NE1成員朴春及同屬BIGBANG嘅隊長G-DRAGON(GD)。

朴春於2014年被爆曾從美國偷運82片禁藥安非他命入韓，雖然朴春解釋安非他命係獲醫生處方、用以治療心理創傷嘅藥物，但佢仍因涉嫌走私毒品而形象插水，一直停工避風頭至今；而GD曾於2011年5月喺日本開騷期間，因蒲夜店吸食大麻而被捕，當時GD承認吸毒，但供稱係無心之失，當時日本檢察廳考慮到GD係初犯故決定不作出起訴。

對於YG藝人不時傳出涉毒風波，前年曾有韓媒記者以大篇幅撰文暗示YG事務所係提供毒品嘅「藥店」，隨後YG事務所起訴該名記者名譽損毀，要求索賠，不過去年3月法院判YG事務所敗訴。