51歲奧斯卡金像影后荷爾芭莉（Halle Berry）兩年前決定同第三位丈夫奧利華馬天尼斯（Olivier Martinez）離婚後，近日有新戀情，新歡係35歲英國音樂人Alex da Kid，佢哋各自喺社交網站公開合照，有意將呢段相差16年嘅姊弟戀公開。

報道指荷爾同Alex只係拍咗拖兩個月左右，佢哋7月曾被發現喺洛杉磯撐枱腳，而喺周一，又一齊參加倫敦時裝周嘅派對，佢哋仲旁若無人深情對望，而荷爾喺公告戀情後，仲公開咗一張踎塔相，賀Instagram突破200萬粉絲，非常風騷。