現代教育（1082）喺香港搞中學補習搞到有聲有色，主席吳錦倫（KenSir）決定連細路仔都撈埋，但戰場唔喺香港，而係轉戰奉行一孩政策嘅神州，一擲800萬，夥拍新華集團喺內地經營「3e」幼稚園同幼兒中心，擺明向班金叵羅嘅父母吸水！

公司業績靚，KenSir噚日心情仲靚，向華華講解時更手舞足蹈，話幼兒教育先係佢最想做嗰瓣，家內地好多大城市出現幼稚園荒，3e教學方式兼具中美教育方法嘅長處，3e代表Explore（探索）、Experiment（實驗）同Express（表達），而採用英語同普通話雙語教學，就有好大潛力咁話。
佢哋家積極喺廣州、南京、蘇州等城市物色機會開設幼兒中心，同時以入股或以特許經營方式經營幼稚園，估計每間幼稚園投資額大約100萬。家國際幼稚園學費每月由5000至萬3蚊人仔不等。華華計計數，如果每年收到百幾二百人，咪立即回本？分分鐘好搵過家陣喺香港搞中學生補習喎。

李華華
mailto:[email protected]