記者訪問Polly當日，她早已到達髮型屋準備接受訪問。精神奕奕的她告訴記者：「𠵱家我嘅生活比以前正常好多，朝早九點返到髮廊開工，夜晚七點收工，一星期放假一日，生活好充實，唔再晚晚蒲D唱K同唔返屋企。」
破碎家庭長大
記者眼前的Polly，面容秀麗，青春可人，然而年幼的她曾經誤入歧途，背後有一些不堪回首的往事。「我讀小學六年級嗰陣，因為貪玩，放學之後經常去屋邨公園流連，有次同人講數打架，結果俾警司警誡；升中之後，我開始啪丸、吸大麻，而且走佬唔返屋企。」Polly低聲憶述。
在破碎家庭長大的Polly，形容其家庭背景「非常複雜」，她細說：「爸爸媽媽喺我只係BB嗰陣離婚，之後阿媽再結婚，但我一直跟外婆住。」而Polly當年「學壞」的原因，與她性格反叛不無關係。「我知道婆婆好錫我，……但嗰陣我唔鍾意俾人困住。至於用刀片𠝹手，係因為我唔開心想發洩。」
經過社工長期跟進及輔導，今日的Polly，已變得懂事和上進，「始終人大咗會識諗，我亦已經厭倦以前日頭瞓覺、夜晚周圍玩嘅生活，重覺得跳舞啲地方同K場好嘈。」Polly說，如今當她情緒欠佳時，會選擇向朋友傾訴，不再傷害自己的身體。