香港係長壽之都，亦係全球工時最長城市之一，退休嘆世界係大家終極目標。噚日喺滙豐中小企峯會「滙智營商」活動上，就有一官一商兩個「阿樑」，示範何謂即將退下火線嘅幸福。佢哋就係月底退休嘅滙豐香港工商金融主管陳樑才（Albert），同埋月底離開政府嘅商務及經濟發展局局長蘇錦樑（Greg）。

蘇錦樑：無官一身輕

Greg So擔任活動主禮嘉賓，一開口講到明，自己就嚟「無官一身輕」，所以「今日講得好輕鬆」。至於「拔哥」陳樑才亦心情靚靚，退休前最後一次出席佢親手湊咗7年嘅baby「滙智營商」，同中小企分享營商心得。
Albert話，家陣科技對金融發展好緊要，人工智能系統AlphaGo，早前擊敗世界棋王柯潔，已證明AI同人類生活水乳交融，佢講笑話，唔知將來中小企峯會，台下嘉賓會唔會變晒機械人㖭呀！
Albert屬於「紅褲仔」出身，港大畢業後就加入獅子行，一份工做超過40年，認真厲害。華華仲記得，昔日滙豐拓展越南市場，Albert親自率領一大班中小企商家，長袖善舞，甚有氣場。本月底佢退休後，將由滙豐（中國）副行長兼工商金融總監趙民忠接棒。

李華華
mailto:[email protected]

97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk