講起靈芝，財爺嘅世叔，佢爸爸嘅好朋友、生意夥伴周文軒好早就賣靈芝與雲芝，唔少商界老友係咁食，一樽靈芝有五百粒，賣四千蚊一樽，唔平㗎，老友楊公話佢小數怕長計，多年嚟已經幫唔少朋友買咗一百萬元嘅貨！
一次聽周先生講，佢阿媽已經一百○七歲，重可以與周先生家姐及弟弟周忠繼打麻將。在座各人無不嚇咗一跳，因為最細嗰位，發明「縱橫中文輸入法」嘅周忠繼都差唔多有八十歲咯喎！周文軒先生位千金嫁咗馮國綸，周忠繼先生位千金不久前加入東亞銀行，襄助李公子民斌成立「私人銀行」（privatebanking），周家人多勢眾兼有長壽DNA，財爺嘅「半島靈芝」與周家嘅「百草堂靈芝」競爭，有排砌。

另一位江浙幫公子，本來經營地產，唔好彩染病，幾年前到史丹福大學就醫，施手術休養之後，返咗香港，唔知有乜高人介紹，猛咁食靈芝。碰啱呢隻靈芝嘅代理權出現問題，公子索性買下香港代理權，由自己家族經營，睇嚟以後財爺家族嘅靈芝同呢位公子代理嘅靈芝又係有排砌！大大話話，市面上肯使錢賣廣告嘅靈芝不下十幾種，新牌子想搶市場，並不容易，財爺家族公司搞宣傳，務必謹慎處理，唔好連累財爺！
江浙公子買靈芝代理之事，令人諗起一段美國商界逸事，就係講一位大富翁喜歡Remington電動鬚刨，喜歡得滯，就成間公司買埋，𠵱家呢隻牌子好似比較少見賣廣告一啲噃。有錢佬大把錢，信心零舍爆棚，鍾意隻產品，索性買埋間公司，幾威風。
但講到豪氣，就點都唔夠啱啱去世嘅KerryPacker，呢位澳洲傳媒/賭場大亨喺拉斯維加斯賭場，唔抵得一位德州油商擺大款，目中無人，於是問油商有幾多身家，油商好沙塵咁話：「一億美元！」Packer就話，不如賭一鋪擲銀仔，要公要字任揀，賭注就係一億美元！呢位油商聽到面青，唔敢出聲，立即離開賭場！