「千金難買靚冧巴」，市民或商業機構，為讓人易於記憶，留下深刻印象，往往會選取一些特別的電話號碼組合。最近便有讀者投訴，其所屬公司已使用三個月、供接受定單的電話號碼，突然被電訊營辦商停用，令他們蒙受金錢損失，其公司會循法律途徑，追討賠償。

ChyrenGroupLimited的秘書Zoe說：「我哋公司經營好多唔同種類嘅直銷業務，通過互聯網、海報單張同卡片，介紹我哋嘅產品，客戶再用電話同我哋訂貨。舊年十二月，公司同新世界電訊租咗九個特別『冧巴』組合，所有電話都一次過畀晒一季費用，分別用喺唔同地方，今次出問題嘅電話號碼，就係專用嚟賣銀製飾物同女裝嗰個。」
不過，這個一直運作正常的電話號碼，上月開始突然失效。Zoe說：「三月中時，公司發現其中一個專做銀飾同女裝嘅電話號碼，連續幾日接唔到定單，跟住打去新世界，問點解我哋冇欠費都停我哋服務，但對方居然話，因為佢公司嘅職員出錯，將呢個一早已經轉咗台、唔再屬於佢公司嘅號碼分配咗畀我哋，所以用唔到！」

生意大受影響

Zoe不滿說：「我哋一直將呢個特別號碼『飛線』到公司電話度，接受客人訂貨，淨係銀飾同女裝，呢段時間都做咗十幾萬生意，有乜理由等我哋用咗差唔多三個月，先話個號碼唔係新世界嘅，咁點解呢三個月又可以用到？」
她又說：「生意做唔到之外，之前用呢個冧巴印好嘅卡片、宣傳單張都冇晒用；原本做好晒菲林，想落喺本刊物嘅廣告，都因為電話號碼失效要臨時抽起，累到人哋遲咗出書，所以刊物方面話要我哋負責賠償損失！我哋公司無端端冇咗個冧巴，生意受咁大影響，但新世界就連賠償同道歉都冇！」
新世界電訊發言人回覆本報查詢時承認，事件是由於其公司職員出錯引致，故向受影響客戶致歉。
發言人說：「根據紀錄，呢個號碼早喺○二年時，已經俾個客帶走轉台，唔再屬於我哋公司，到○五年十二月，因為職員疏忽，先會將呢個號碼再提供畀客戶。」

豁免預繳費用

發言人指出，於本年三月發現出錯後，已主動聯絡客戶，提供另一黃金號碼，以取代原來號碼，並豁免客戶於這三個月已預繳之七十五元費用。
發言人說：「因為呢個號碼一早已經唔再係我哋公司，所以有理由相信，客人由登記第一日起，就用唔到呢個電話嘅服務，所以我哋公司亦無紀錄，證明呢段期間客戶有冇用到呢個電話。」
至於因為是次失誤令到客戶蒙受損失，新世界表示會繼續跟進。「如果客戶堅持要賠償，好似已經印咗嘅卡片同宣傳單張損失，公司會搵同事跟進，按個別情況決定。至於個號碼係咪曾經租出後可以正常使用，如果客戶證明到，我哋公司都願意進一步了解。」
檔案編號：0404008

服務熱線
電話：29908288
傳真：23702192
電郵：[email protected]