當年今日

趣趣地:噴射機食好西 今季開齋

蘋果日報 2018/11/24 00:00


上季喺澳職常規賽同季後賽都飲恨做二奶嘅紐卡素噴射機,今季開季至今四輪聯賽都未贏過,但佢哋周五作客西悉尼流浪者,終於打開今季勝利之門。

紐卡素噴射機兩個星期前喺主場1:1逼和FC悉尼,打起番信心,今仗作客另一支悉尼球隊流浪者,踢到25分鐘就由積臣荷夫曼喺門前接應杜普史丹利橫傳鏟射建功,亦都係呢位因首席射手奧當路雲停賽、由右閘客串踢正箭頭嘅3號仔,今季首個入波。

雖然西悉唔係冇扳平機會,但班球員唔爭氣,馬祖克同隊中首席射手奧利奧爾尼亞拿都係把握唔到良機。結果踢到補時四分鐘,噴射機靠一次反擊,柏拉杜斯入禁區展示個人功架,擺脫對手後橫傳畀後上嘅朗奴華加斯撞射入網,最後以2:0贏波,打開今季勝利之門,仲追到同西悉一樣五分,憑得失球差壓倒對方上第六位。