當年今日
關於我們

【分手後首度亮相】超蓮布吉晒泳照 孖生細佬猷啟:佢身材幾好嘅

蘋果日報 2017/06/08 19:50

何超蓮陳婉珍東華三院三太何猷啟

何猷啟今晚代表媽媽三太陳婉珍,到北角新光戲院出席東華三院粵劇晚會,佢話三太今次活動嘅首席贊助,但就唔知媽媽捐咗幾多錢喎,只知道媽媽本身好鍾意粵曲,記者問到為何三太缺席活動,猷啟就話只係有小毛病,患咗感冒。
猷啟之前同外籍索模女友Angelika分手,今日係佢分手後首次出席活動,講到心情,猷啟話:「其實都冇乜時間去諗,o依家要專注手機遊戲嘅工作。(有冇同前女友聯絡?)都有,我哋再見亦是朋友囉!(係咪太忙,聚少離多,所以先分手?)都係嘅,但就冇第三者。」
對於有指猷啟因為太傷心,唔想睹物思人,所以就將instagram嘅內容全部刪除,猷啟就話:「唔開心就一定有嘅,(怕觸景傷情?)係,家姐同媽咪都有叫我唔好難過!」追問佢可有機會復合?佢話:「冇諗呢件事,都係專注工作,工作為先,(媽咪都咁叫你?)係呀!o依家係搏殺期。」
講到孖生家姐超蓮之前喺布吉度假時晒比堅尼相,猷啟直言:「我有睇到新聞,(覺唔覺佢好hot?)佢身材幾好嘅!亦唔覺佢好大膽,游水都係着比堅尼㗎啦,OK嘅,媽咪亦冇話佢。」