【笑到最後】港交所重上300蚊的啟示（高明）
蘋果日報 2020/06/21 15:31
港交所高明笑到最後
多隻中資股回歸港股，由去年阿里巴巴打頭炮開始，當時陳茂波及董建華都有出席上市儀式。
港交所（388）周五重上300元，今浪吹起，叫「中概股」，近日行政總裁李小加喺唔同場合不停唱好中概股，佢唱好，當然有佢嘅理由同埋工作需要，但如果要買佢嘅股，就係另一回事。
高明曾經2018年1月喺300蚊樓上高追過港交所，依家睇返當年筆記，當年因為騰訊（700）同平保（2318）升咗成年，港交所終於開車，心雄一齊買落去。結果？事後睇返，幾乎係港交所近年最高價高追。
港交所雖然畀人覺得一早染咗紅，但係以佢嘅概念同埋股價走勢，香港仔性格濃厚：埋堆、雷聲大、改頭換面再賣過。每隔三五年，總會畀港交所搵到個概念去抽水，最巨型嘅一次要數07年資金自由行，只係吹咗兩句設境外證券證點，股價就炒咗上去，後尾資金自由行不存在而無疾而終。2015年再將同一件事再推過，改過個名做滬深港通，同一招又可以借A股牛市再炒上去，並且喺港股大時代時首次升穿300蚊。2017年就係慢牛加一堆科技分拆概念股上市。
今次就到吹中概股回歸，呢個概念，本身已經有問題，喺美國上市好哋哋，有大球場唔踢，點解要返香港踢街場？因為驚俾美帝制裁，所以先要返一個球場球證球員都係自己友嘅地方，諗住踢得安落啲。事實上，如果要受制裁，喺香港上市一樣會受制裁，例如當年俄鋁（486）。中概股逃亡潮，叫做賺埋回港上市嗰筆，比起當年中國股民炒香港股票更加唔實在。
退一萬步，就當中概股隻隻好嘢，過去咁多次概念都未試過令港交所超越輪迴上落。炒概念嘅本身，都比起炒港交所更直接。例如17年慢牛可炒騰訊平保，人哋升咗成年，港交所實際喺2018年1月先正式開車，而且上升時間短。今次美團（3690）一眾股炒起，港交所亦要尾圍用膳。
直通車、咩額度、互聯互通、收購倫交所、中概股，港交所咁多年嘅重大概念，只要每一個完成吹水期嘅一半，依家股價恐怕已過千蚊。可惜現實只係重上300蚊。有咁優秀嘅股價往績，呢啲錢睇嚟都係畀其他人賺。
筆者為證監持牌人，冇持有港交所。
高明
-----------------------------
-----------------------------