李佳芯（Ali）同黎諾懿呢對螢幕夫婦，今朝一早到科學園擔任跑步活動嘅起跑嘉賓，今晚又孖住去頒獎禮，Ali指實行好頭好尾，諾懿指兩人合作咁耐，今次係第一次一齊接搵錢工作。

今晚角逐視后，Ali坦言未開始緊張，可能到宣佈五強時先會心跳加速。諾懿表示日前返大台時不停為Ali拉票，起碼多咗二十幾人投畀Ali，佢話：「五強就唔關我事，不過我會揀坐喺呼聲高嗰啲如王浩信隔籬，博黐下上鏡。」近日有報道指Ali腎臟同免疫系統出問題，又被指擺款推劇，Ali話：「我都冇講（腎臟）有事，生粒粒就有，o依家情況好咗好多，至少可以化妝遮到。」至於推劇一事，佢指唔係事實唔回應，仲笑住話：「我係蠢，但唔係儍，點會咁做。」

精選娛聞，喺晒《娛果》
http://fb.com/appledailyent