周日第八場三班1600米，告東尼隻「好好機會」已比最近上名低14分，當然久沉馬可以低處未算低，不過上仗跑同程1600米，已見復蘇走勢，該役此駒沿途前領，頭1200米造1分11秒8，比當日另一場同程快一秒之多，「好好機會」耗力搶放下，末段都斷唔晒，只輸一乘多，似乎狀態已跑起及評分已有迴旋餘地。今仗抽二檔只負111磅，必可貼欄採取主動，吳嘉晉剛戰贏「幸福指數」，已經重拾信心，「好好機會」有望重開勝門。