皇家馬德里球星基斯坦奴朗拿度（C朗）早前因為畀西班牙當局指控逃稅，不滿之下希望可以離開西班牙，之後就有傳C朗有可能重返2009年以當時世界紀錄轉會費8,000萬鎊離開嘅球會曼聯。不過，曼聯星期六喺美國進行嘅第一場季前熱身賽以5:2大破洛杉磯銀河之後，領隊摩連奴被問到有關簽返C朗嘅問題時就話呢個係「不可能任務」。

對於曼聯再簽入葡萄牙國家隊隊長呢個問題，摩佬話︰「我唔會要球會嘥時間喺冇可能簽到嘅球員身上。C朗喺佢間球會係咁重要嘅球員，有好大經濟效益，我哋搵唔到任何令我哋覺得C朗係可以離開嘅理由。」

至於另一位皇馬球員艾華路莫拉達，摩佬亦認為對方唔會入「魔」。摩連佬話覺得好可惜︰「佢喺我旗下成為一隊球員，我非常欣賞佢，我好開心睇到佢喺祖雲達斯同皇馬嘅發展，但我哋同佢所屬球會並未達成協議，我唔認為佢最後可以加盟我哋。」