李八方online︱李百全「欽點」羅健熙做財政司司長？
蘋果日報 2021/03/26 19:08
李百全羅健熙財政司司長李八方online
新任廣播處長李百全上任後，先後多次出手閹割港台節目，如《香港故事》訪問本地樂隊LMF及《議事論事》談及人大改革香港選舉嘅集數都被抽起等。不過，可能新處長忙於清算港台節目，有啲細節位就未有留意到。
港台今日向傳媒發出採訪通知，提醒下星期日（28日）新一集《給香港的信》節目嘉賓為羅健熙。羅本身係民主黨主席，同時身兼南區區議會主席，不過八方就發現，採通上面將羅健熙稱為「財政司司長」，英文版採通嘅職銜就仲係南區區議會主席。羅健熙突然做咗財爺竟然無人知，唔通新處長大到可以公佈主要官員任命？
不過，好彩港台都好快手發現錯咗，並更新返羅健熙嘅職銜，否則又可能被處長「清算」。但話時話，新處長上場後曾揚言乜嘢都要先行過目，隨時佢可能都睇過份採通，有份欽點羅健熙做財爺。
港台今日向傳媒發出採訪通知，提醒下星期日《給香港的信》嘅節目嘉賓為羅健熙，但就寫咗羅係財政司司長。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！