六四紀念日，好多有心人晏晝已經走入維園，霸定靚位參與燭光集會。唔少人一踏入維園，忽然以為自己去錯地方：乜中央已經河蟹埋維園，將佢變成天安門廣場？擦擦眼睛睇清楚，原來眼前嘅天安門，只係一幅巨型印畫布幕，但布幕中間仲見到民主女神像同民主烈士紀念碑，真係令人有時光倒流22年嘅感覺。

學生體驗「廣場」過夜

一班勇敢少男少女喺廣場上爭取民主嘅一幕，再次觸動人心靈。到咗夜晚，人人喺布幕下高舉燭光，時空交錯，仲以為終於可以喺天安門廣場下悼六四，振奮人心。
究竟邊個咁有諗頭，乾坤大挪移將天安門廣場重現眼前？震撼人心嘅幕後黑手，原來係支聯會兩位年輕常委李耀基同盧偉明。八方好想知道，佢兩位係咪一早預料有咁嘅迴響？身為總設計師之一嘅李耀基好謙虛，話估唔到出到嚟反應咁好，個佈置仲成為六四集會景點。原來當初佢同盧偉明負責搞啲推動年輕人參與六四紀念嘅活動，發現今年六四咁啱喺星期六，學生喺周五晚又通常比較得閒，所以構思個走出課室嘅六四教育。學生，一定最明白學生心情，佢哋想畀學生親歷其景，體驗六四發生過乜事，因此特別安排佢哋喺「天安門廣場」過夜。
一講天安門，大家一定諗起掛有毛澤東畫像嘅城樓外貌，李耀基因此四出搜刮啱用嘅相，但唔係角度唔啱，就係解像度唔夠，搵咗好耐先至得出最後呢幅。好彩有個義工搞印刷，唔理三七廿一幫忙，好快手就整咗呢幅巨型布幕出嚟。

參與者睇見都眼濕濕

單有背景都唔夠，李耀基同盧偉明刻意喺現場擺放民主女神像同民主烈士紀念碑，加上有班年輕人喺「廣場」外靜坐，真係好有八九民運feel，難怪好多參與者一睇見呢個場景都眼濕濕，好自然咁憶起22年前嘅悲痛歷史。
今次嘅設計構思獲讚賞，李耀基話全賴支聯會領導放手畀佢哋去搞，以後啲創意嘢陸續有來，目的只有一個，將六四精神薪火相傳。相信華叔在天之靈，都會大讚兩位佢一直愛錫嘅後輩有料到。
mailto:[email protected]