當年今日
關於我們

轆Book:扮晒雙門跑車
Alfa147刻意隱門

蘋果日報 2007/05/15 00:00


親愛的茱麗葉,我唔係想刻意「隱門」,我都係迫於無奈,你知喇,我係一個「愛快」嘅「羅密歐」,喺一般世俗人嘅眼裏面,「快」同「雙門跑車」經已畫上咗等號,如果畀人知道我實質係四門而唔係雙門嘅話,我愛快呢個形象就會蕩然無存,所以我一定要將後座車門嘅門柄隱藏住,等人以為我仍然係架雙門車。茱麗葉,我好希望你可以原諒我「隱門」,至多第日飲茶灌水我嘅!

記者:周達之
攝影:陳偉強
模特兒:Joey
empty
Alfa147Facelift
$278,800
empty
■車仔細細有成150匹馬力,配埋「棍波式自動波箱」,直路衝刺及攻彎都更得心應手。
點解要「隱門」?
一眼望落呢部Alfa147Facelift2007,真係差啲以為係雙門跑車,皆因驟眼望落去佢只係得前座車門有門柄,但再望真啲,原來後座門柄擺咗喺C柱前面,仲要加埋「保護色」與C柱混成一體,好明顯係特登「隱門」,令佢保持番雙門跑車嘅不羈造型,真係虧佢諗得出。
新款147嘅造型畀人一種好簡潔嘅感覺,而流線型嘅設計務求令風阻減到最低,三角形鬼面罩仍然係愛快嘅標誌,加埋個酷似古代皇族嘅徽章,AlfaRomeo一直流傳落嚟嘅浪漫情懷真係一時間好難搣得甩,而車迷對佢雙門跑車嘅印象亦十分深刻,難怪廠方即使要推出四門車,仍然要刻意搞到好似雙門咁嘅款,為嘅都係唔想破壞Alfa一貫嘅浪漫形象。
empty
■門柄隱藏喺車窗同C柱之間,咁都俾佢諗到。
浪漫滿車
既然浪漫係Alfa嘅形象,所以今次試嘅呢架147,內櫳都一樣咁浪漫;就以中控台為例,好多車碼都有個LCD顯示吓資料,但浪漫嘅147居然夠膽齋裝個杯座上去,唔通真係有情飲水飽?其他浪漫裝置當然唔少得睇月光嘅天窗,而代表心心相印嘅紅色座椅亦係Sharp得嚟好順眼,其他牌子嘅車用紅色座椅會覺得好突兀,但Alfa係兩個例外嘅其中一個(另一個係法拉利)。軚盤上嘅Audio控制按鈕亦係為方便情侶聽冧歌而設,情到濃時你可以隨即校大聲啲首冧歌嚟襯底,感覺就好似愛情片到劇情高潮時響起BackgroundMusic一樣,若然閣下再整番個權相佑眼神,坐你隔籬嗰個想唔冧爆都幾難!
empty
■由中控台到軚環設計,均仍保持到Alfa那種貴氣加跑味嘅風格。
empty
■2.0升16VTwinSpark引擎非常好力。
empty
■自動波及+/-波任你揀。
empty
empty
■浪漫滿車,又點少得一個曬日光同曬月光嘅天窗呢?
empty
■愛快嘅皇族徽章亦係佢浪漫嘅泉源。
無想像中咁斯文
之前試過全跑格嘅AlfaBrera3.2JTS,260匹直路夠辣,片彎既快且狠。今次呢部147初時仲以為佢會斯文啲,但點知片起上嚟一樣咁辣,雖然由於懸掛偏向舒適軟性,喺運動性上無前者咁優秀,但整體上仍然令人盡興。波箱採用棍波式機械原理設計、自動波式操控,即係147會自動幫你控制極力子,呢種設計比一般自動波嘅好處係能減少動力流失,好力得嚟慳油,耗油量官方數字係8.9L/100km。小記試車當日覺得無論係用自動定+/-波,換檔嗰陣都一樣係咁順暢,值得一讚。
empty
■後座可坐三個人,由於並非仿桶椅設計,當梳化床瞓都咁舒服。
蘋車會
覺得佢無想像中咁辣,不過話晒147唔係Sell跑格,所以都情有可原,若當佢四門房車看待,舒適性同運動性都叫水準以上。
empty
攝記Ringo
真係好鬼鍾意Alfa個獵鷹鬼面罩,新版147平衡到雙門跑車同四門房車嘅優點,辣跑得嚟亦唔會「趕絕外母」,出入後座不再辛苦,抵讚!
empty
老編William
新車速蘋
.「隱門」設計保留雙門跑車風味
.外形一貫愛快式浪漫
.內櫳設備簡約無乜嘢玩
.換檔順暢幾好跑
引擎:1,970c.c.直4TwinSpark
馬力:150hp/6,300rpm
扭力:181Nm/3,800rpm
傳動:5前速半自動波,前輪驅動
尺碼:4,223×1,729×1,442mm
重量:1,250kg
車輛提供:AutoSportivaLimited(28778788)
empty