日本女星米倉涼子憑住《Doctor-X》系列登上事業高峰，佢已接拍朝日電視台10月開播新劇《Legal V~前律師．小鳥遊翔子~》，今次米倉唔做女神醫Doctor-X，改演律師Legal V（Victory），米倉仲為角色剪咗20cm長髮，首次以短髮造型上陣拍劇。

米倉在劇中飾演嘅小鳥遊翔子係被剝奪律師牌嘅精英，背景神秘嘅佢後來開設咗法律事務所，帶領弱小律師團隊對抗大型法律事務所，電視台今日終於公佈其他演員陣容，包括林遣都、安達祐實、高橋英樹、荒川良良、勝村政信以及新婚嘅三浦翔平，而向井理同埋小日向文世就演米倉嘅強勁對手。

今次《Legal V》有多位人氣演員助陣，其弱小律師團中六位成員，佔四位係首次同米倉合作，當中林遣都嘅造型已經曝光，引起唔少《大叔的愛》粉絲大讚其新look十分可愛。米倉嘅人氣舊作《講數阿姐》曾搬上大銀幕，電影版《講數阿姐之凶中危機》就同林遣都有不少對手戲，令二人相隔七年半再度合作。

精選娛聞，喺晒《娛果》
http://fb.com/appledailyent