運輸及房屋局副局長邱誠武噚日首度出席立法會會議孭飛上陣，向議員講解極具爭議性嘅的士短加長減收費方案，估唔到邱副局長一出閘就脫腳，會議開始都仲未見人。哦，原來人有三急去咗廁所，要副手代勞向議員解畫，遲咗成分鐘先現身。
邱副局長係傳媒出身，以前成日品評政治人物，做官後角色對調，噚日幾大政黨輪流炮轟佢，猛鬧政府唔立法禁止市民同的士司機議價，縱容的士折扣黨，邱副局長處男登場，面對重炮幾乎招架唔住，一味照稿讀，仲越講越蚊滋咁聲。幾位副局長噚日分別落區做施政報告諮詢會，煲呔勢弱，副局長做硬炮灰，食物及衞生局副局長梁卓偉被民主黨區議員杯葛，當佢透明。