上個禮拜五，恒指服務公司公布最新季度檢討結果，中國人壽（2628）同工商銀行（1398）以大熱姿態，雙雙上榜成為染藍H股，但係啲網民似乎關心舊年「搞風搞雨」，最後得個桔嘅電訊盈科（008）幾時被out多啲。

網友小估民喺《公眾投資168綜合論壇》話：「若果電盈俾人踢出嚟仲好，以後同恒指無關，可以輕鬆上路。」
但係人都知道，電盈𠵱家股價唔夠5蚊，市值只得300幾億銀，仲持續一段時間穩佔最細市值藍籌股榜首，邊有大戶會搵電盈嚟舞動恒指㗎，out唔out，對大戶或者期指友都無乜影響，對散戶嘅心理影響可能仲大啲，部份俾佢累到輸錢嘅散戶，或者會感到大快人心。

事實上，電盈out唔out出恒指，仲有好多考慮因素嘅。網民河馬大仙講得都幾有道理，佢認為「因為政治理由，8號仔係好難被踢出恒指嘅，否則，恒指只有中資電訊股（係成份股），冇本地電訊股，（恒指服務公司）可能會怕俾人嘈。」
之但係，恒指服務公司上周五同時公布，由下季度檢討開始，成份股變動將有4條新準則，其中一項係：市值較小及流通量和成交量較低嘅成份股，將被考慮剔出恒指，咁，大家係咪可以將電盈對號入座呢？