住喺中西區嘅居民，一定對西環皇后大道西森美餐廳門口嘅巨型牛牛招牌（下圖）印象好深，但呢個1978年已存在嘅當區地標，因為屋宇署要清拆僭建物，噚日慘遭「拆招牌」。有網民喺「西環變幻時」fb專頁貼出幾張相，見到有大型吊臂車到場，工人爬上去將牛牛綁好拆走，招牌之後會送畀M+視覺博物館保存。

當年製作費夠買樓

舊年接受訪問嘅森美餐廳第二代掌舵人葉鳳儀曾經講過，高約10呎嘅牛牛招牌係爸爸當年花咗5萬幾蚊製作，價錢當時夠買一個住宅單位，原本想整成腿短身胖嘅安格斯牛，但係招牌師傅覺得唔靚，擅自將雙腳拉長變成「黃牛」，估唔到一擺就擺咗30幾年。
森美餐廳現時負責人嘅葉德盛就話，自從1978年掛咗呢個牛牛霓虹招牌後，除咗打風落雨，每晚6點準時亮燈，晚上11點關燈。
發光地標消失，葉德盛話難免有不捨之情，透露新招牌會改以LED燈製造，目前仍喺設計階段，預計體積會大幅縮小，但係今次唔會再用牛形設計，改為喺長形招牌內，畫牛牛嘅身影。