【光復區會●啟業】被李力持「掟落」垃圾桶 新丁尹家謙：銘記抗爭青年犧牲
蘋果日報 2019/11/28 00:01
李力持藍絲光復區會尹家謙
區選投票當日，撐警導演李力持於facebook出帖，圖文並茂展示自己將觀塘「啟業」民主黨參選人尹家謙的一叠宣傳單張掟入垃圾桶，聲稱要「趕絕犯民」，結果4,433位選民撐尹入議會，同區建制派被趕絕。29歲的尹家謙對被「招呼」笑言「咁睇得起我」，坦言要將李力持「染黃」有難度，因為「詐瞓嘅人叫唔醒」，直至「佢哋俾個國家機器迫害先會改變睇法」，但已為候任議員的他仍希望透過實踐地區工作，撼動諸如李力持般的「藍絲」。
記者 梁穎妍
以約600票之差大勝建制對手的尹接受《蘋果》訪問時坦言，對李於11.24將其宣傳單張掟入垃圾桶感詫異，「我哋啲文宣喺唔同日子派發，佢都特登收藏起晒，等嗰一日揼落去」，笑言：「咁睇得起我！」他指文宣一字一句都是心血，「希望每位選民都睇清楚我哋背後嘅理念或者地區工作，如果睇完都覺得係垃圾就冇辦法啦，我哋從政都係憑原則憑良心做事」。
要將「藍絲」變「黃絲」實不容易，尹稱，明白社會上有不同意見人士，坦言「點樣軟化（李力持）呢個問題都考起我，（要）佢哋自己畀個國家機器迫害先會改變睇法」，他直指遇到原本親中街坊眼見政權暴力鎮壓年輕人而覺醒，不過裝睡的人永遠叫不醒，「有啲人覺得警察做乜都啱嘅都冇辦法，希望李導能夠睇多啲真實畫面，唔係信晒其中一邊，希望你能夠明白點解年輕人會上街抗爭，點解今屆投票率咁高？正正顯示社會幾咁不滿政府」。
畢業後在民主黨主席胡志偉辦公室擔任社區主任3年，尹稱最大信念是民主由地區扎根，「沒有民主就沒有民生，相信有民主、政府傾聽人民聲音，先至真正改變到民生」，他認為勤力進行地區工作始終是撼動「藍絲」的基礎，「除咗用心工作令佢認同你嘅工作，勝利都冇乜不二法門」。
尹的選區內有兩個舊屋邨，尹指會投放心力多做老人服務，爭取老一輩認同，「因為有啲飛（票）我哋叫雷打不動，佢認住呢個人，尹家謙、謙仔幫到佢所以投畀我，其實呢啲飛好重要」，指社會回歸平靜，沒有反政制票源下就要鬥「鐵票」。
尹亦指，議會工作要兩條腿走路，抗爭與民生缺一不可，「今次好多係反政府嘅票，喺我選戰背後好多抗爭者年輕人犧牲，我會好銘記呢一點」，他明言會將抗爭聲音帶到議會，杜絕「警謊」，「包括動議支持五大訴求，追究警暴，其實區會大會都經常傳召官員解釋，希望令大家唔好再覺得區議會係和稀泥同橡皮圖章，喺議會用得到嘅權力都會用」，也希望以區議員身份在衝突現場出一分力，強調真正的勝利是當五大訴求得到回應，否則修補社會撕裂無了期。