香港學生，由細到大，一定試過「走火警」（防火演習，Fire Drill）。上堂期間，失驚無神響起「警鐘」（其實同上堂/放學同一個鐘），書包都唔准攞，就要跑到空曠地方……

美國，或者英國，唔止有 Fire Drill，仲有 Lockdown Drill，「上鎖演習」。

輕鬆面對

Lockdown Drill，直接聯想到校園槍擊事件，「因為．所以」。事實上，Lockdown Drill 除咗係「槍手入侵」，亦係「嚴拿白撞」或「其他恐襲」的應變措施。

個仔返學冇耐，就收到學校 email 話會有 Lockdown Drill。

當日放學，我就問阿仔：

「今日學校係咪有特別事發生？」

「係呀，忽然好嘈，跟住老師就鎖門鎖窗同熄燈，仲叫我哋匿埋喺枱底。」

「咁你驚唔驚？」

「唔驚，以前喺香港都試過走火警，差唔多，不過今次唔使走出街。有樣嘢唔同，今次係唔准講嘢，要安靜。」

被動主動

對小學雞來說，「匿埋」相信係最有效方法。而初中或者高中，應變方式略有不同，學校會指導大哥哥大姐姐點樣用枱同櫈去阻塞課室門，而喺保持安靜期間，建議唔好用/玩手機。

據了解，部分州分學校「過分認真」處理 Lockdown Drill：事前冇通知家長、請人扮槍手，事後，當然有唔少投訴。亦有學校覺得唔可以坐以待斃，聘請前 SWAT Team 成員，教老師點樣反擊！

每週一單

的而且確，冇人想見到校園槍擊事件，偏偏，有報導指出，截至2018年5月25日，21個星期內，發生咗23宗校園槍擊事件！

驚？一定！

可以點？

提醒仔女保持冷靜、鎮定，「演習」點做，照做，留意四週環境，再加多幾分肉緊。

各種可能

其實，呢類安全/危機演習（Safety Drill），又點止 Fire 同 Lockdown 兩種。仲有龍捲風演習（Tornado Drill）同地震演習（Earthquake Drill），美國，「乜都有」。

註：原本打算寫關於父親節，不過阿仔返咗香港，冇得慶祝！另外，學校教佢父親節係「Dad’s Day」，Google 一番後，好似得 Amazon 係用呢個 term。始終覺得 Father’s Day 順耳好多。

作者：三個A。2017年，一家三口選擇移民慶回歸。十五個鐘飛機、八個鐘頭車，終於到達俄亥俄州當中一個小鎮，大人細路，齊齊 Life Reboot。之不過，原來美國……