【李八方online】梁啟智退出工黨：既然理念不同，惟有分開上路
蘋果日報 2020/09/04 19:51
李八方online梁啟智工黨郭永健退黨
所謂合久必分、分久必合，經常以時事評論員身分同大家分析問題嘅香港民意「我們香港人計劃」名譽總監梁啟智，今日（4日）宣佈退出工黨。梁啟智係工黨創黨成員，同工黨經歷咗9個寒暑，今日佢表態退黨時透露，有感黨領導層未有實際行動去回應放低昔日爭拗、正面回應本土思潮問題，惟有決定分開上路。
其實去年開始嘅反送中運動令到好多民主派政黨嘅政治色彩變得分明。梁啟智喺社交網站宣佈退黨嘅同時，亦提到過去9年以來，香港政治環境翻天覆地，專制打壓、本土思潮乘勢而起，佢覺得工黨本來可以喺本土思潮中大有作為，可惜「儘管本人多次催促黨領導層放下往日爭拗，正面回應本土思潮，卻久久未見實際行動跟進」，於是「既然理念不同，唯有分開上路。」
工黨主席郭永健：
佢可能覺得工黨呢一年「步伐行得較慢」
究竟工黨內部有咩爭拗？工黨主席郭永健就同八方講，其實因為疫情未完全受控，上次開黨內會議，已經係6月嘅事，而上次同梁啟智傾偈，亦只係關於民主派初選嘅選舉分析、抗爭派嘅定位問題等，認為梁啟智可能覺得工黨呢一年間「步伐行得較慢」，加上喺初選見到唯一代表工黨參選嘅吳敏兒落敗之後都冇咩變化，追唔上而家嘅政治局勢，先會有呢個決定。
點都好，郭永健亦讚揚梁啟智係一個好幫得手嘅學者，感激佢咁多年以嚟一直有為工黨提出專業意見分析，希望喺疫情好轉嘅時候再同梁啟智傾吓喎。
-----------------------------
《蘋果》英文版免費試睇：了解更多
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！