英皇眾歌手前晚在九龍灣國際展貿中心演出晒冷騷「EEGSummerHits全城優先選」，竟然齊齊發台瘟出錯，打頭陣出錯的是失魂魚容祖兒，當所有歌手出場拋沙灘波給觀眾時，她連波帶咪一同丟落台，嚇得台下觀眾嘩然。

事後祖兒說：「我都好驚，見到Mani同吳雨坐我前面，掟中人就有命案，要腰斬個騷。我好神經質㗎，今朝同霆鋒搭飛機返嚟，突然叫佢幫我搵帽，但原來我都冇戴帽。」
霆鋒則說：「祖兒話佢掟咪落台，真係型，咪都掟得落台，我企佢後面情願佢掟中我，佢啲蝦碌嘢成日發生，我都慣，但掟咪都幾盡。」但霆鋒其後與祖兒合唱《心仍是冷》時亦唱錯歌詞。
Twins穿tubetop唱森巴皇后又唱又跳，其間鍾欣桐（阿嬌）轉身時，假髮勾到男舞蹈員的衣服，她雖裝作若無其事繼續演出，但仍頗為狼狽。而梁洛施（Isabella）和鄭希怡（Yumiko）合作表演勁歌熱舞時，Isabella不慎拗柴，幸好Yumiko眼明手快扶着她，但驟眼看二人似撞作一團，十分搞笑。關智斌（Kenny）、吳浩康和李逸朗則一同演奏樂器，Kenny負責吹色士風，但演出完畢後他怒氣沖沖走入廁所，原來他有一獨自表演環節，但表演前遺失了樂譜，以致他吹得錯漏百出。

至表演尾聲，眾歌手出場再拋波給觀眾，霆鋒將波拋起讓吳浩康起飛腳踢落台，但他卻踢空氣，整個人跌坐地上，算是整晚最失威歌手。
此外，提到韓國歌手Rain在港人氣極盛，阿嬌說：「連佢呼吸啲人都嘩，未見過《勁歌》啲人都企晒起身。」
採訪：李珮洳　攝影：何國豪