名媛邱李茂琪（Margaret）醉心藝術，丈夫邱子傑（Jeffery）家族經營鐘錶生意，今年二人結婚邁入22年，多年來男主外、女主內，Jeffery負責生意，Margaret則負責照顧家人，而Margaret多年前重拾畫筆，作多種藝術創作，3年前更創立自己的珠寶品牌，她更是家中的「發明家」，最近，她更化身室內設計師，為丈夫於尖沙嘴的鐘錶公司設計貴賓概念樓層，打通兩舖6000呎的空間，以resort為主題的樓層中央放置能坐20人的長桌，旁邊設有兩間貴賓室，同時有保養維修部，最特別是大型的bar枱兼能供米芝蓮主廚烹飪的廚房，Margaret更求老公借出私伙藝術品為新舖粉飾，為概念店添上藝術氣息。

Margaret是家人朋友群中的「發明家」，她日前接受《蘋果》訪問時笑說：「其實我細個已經好鍾意發明嘢，又鍾意整新嘢，佢哋都會叫我女博士。好似之前屋企發明咗張茶几麻雀枱，因為我有幾個朋友好鍾意打麻雀，但喺屋企有張麻雀枱又好唔靚，所以就諗咗呢個設計；又試過設計outdoor酒吧，大家都知我鍾意發明嘢。」

Margaret跟李嘉欣、盧淑儀等份屬老友，她又笑言自己經常有瘋狂的想法，朋友們與老公均成為白老鼠，她說：「唔一定係珠寶，有啲發明，佢哋都覺得幾好，好似去旅行時，喼入面嘅污糟衫同底衫褲飛到周圍都係，如果俾人查嘅時候會好核突，我就做咗一個4格、有上下層有拉鏈嘅袋，佢哋到而家都會帶住；修甲時怕俾LED燈照黑，我會做咗一啲開窿嘅手套，大家都覺得幾得意。」為了新店，Margaret製造出一個3D Robot任代言，未來，她揚言已計劃向有功能的AI設計進發。

Margaret和老公育有一對子女，大仔邱聖橋與孻女邱聖華（Jessie）均已到美國留學，對於家族生意的承傳，Margaret說：「冇所謂㗎！每個人嘅興趣都唔同，一定要出去闖吓嘅，我唔buy啲人一返嚟就（幫屋企），就算佢哋要創業，都要自己去闖吓！就算出咗去30年後返嚟都得，我哋唔係好傳統，行行出狀元，如果真係諗到啱自己，又可以發揮到都得㗎！入咗大學之後，我哋任務已經完成，將來點樣闖就靠自己。」

大仔喜歡藝術、細女則喜歡服務性行業，Margaret指一對子女的喜好很不一樣，目前她只希望仔女享受大學生活，不要只求分數，問到怕細女辛苦嗎？Margaret笑說：「佢好捱得㗎！佢可以企8粒鐘唔出聲，曬到飛起幫人攞嘢，乜都得。」邱氏一家四口人前人後也相當溫馨，提到如何保持如此關係？Margaret笑說：「其實我同Jeffery係喺大學時期、啱啱係大仔呢個歲數認識，而家大仔期待自己老婆出現。當年我哋好早識，亦係朋友中最快生小朋友嘅，好多嘢都唔知點處理，所以而家一家人有乜嘢事都會開家庭會議，民主得嚟唔好一個做衰人，係就一齊做。」

採訪：羅慧敏
攝錄：馮嘉銘

-----------------------------
7月4日起 《蘋果動新聞》只限升級壹會員閱覽
繼續撐蘋果！